Admin
المدير العام
عدد الرسائل : 127
العمر : 39
تاريخ التسجيل : 24/10/2007
the points
the points:
    (5000/5000)
 |  موضوع: برنامج على قلبكم وقلب الي جابوكم  السبت يناير 19, 2008 2:30 am | |
| في احدى القنوات الغير معروفه لاحدى البلاد الغير معروفه ايضا سمعت برنامج جميل جدا وبالصدفه كان البرنامج يستضيف رئيس دولته وقد جاء فيها الاتي::::السلام عليكم ورحمة الله وبركاته
ضيف حلقة اليوم
من برنامجكم (علي قلبكم وقلب اللي جابوكم )
هو السيد ...........................
رئيس الجمهورية ............
المذيع : اهلا بسعادتك ياريس ..
الريس : (يهز رأسه مبتسمآ )
المذيع :كما عاهدناه ..متواضعآ ..ديموقراطيآ..محب للأمن والامان
الرجل الذي أفني ولا زال يفني حياته للحفاظ علي حياة أكثر من 75 مليون مواطن .
الريس : هوا عددنا وصل ل 75 مليون وانا ما اعرفش ؟
المذيع :يا أفندم العدد بأه في الليمون ..كان الله في عون سعادتك.
الريس: فعلا ...انا النوم مخاصم عيني ...وعمري ما عرفت معني الراحة من يوم ما مسكت مهام الدولة ..ليل ونهار بحث ومقابلات واجتماعات وقرارات من أجل الشعب.
المذيع :يا أفندم الشعب مقدر كل اللي سيادتك بتقوم بيه..والشعب لو مش بيحب سيادتك
ما كانش ممكن يختارك ويسمحلك برئاسته تأبيدة ...(يتدارك) قصدي 25 سنة .
الريس :طبعآ طبعآ ...انا للشعب ...ومن الشعب ...وللشعب .
المذيع : تحب سيادتك نشوف الفاكسات والرسايل وال sms ؟؟
الريس :اتفضل ..وياريت تقرا كل الكلام من غير ما تحذف حاجة ..وبدون خجل او خوف .
المذيع : أكيد يا افندم ...في رسالة وصلت للبرنامج من موظف بريد علي الدرجة الرابعة
بيقول فيها ...( يتوقف المذيع عن الكلام )
الريس : بيقول ايه؟؟ اتكلم من غير قيود احنا مش ضد الحرية والديمقراطية .
المذيع : بيقول .....سيادة الرئيس يبدو ان ما ينبض في اعلي الجانب الايسر من جسدك
ليس بقلب ...لانه لو كان لديك قلبآ ..ما كنا وصلنا لما نحن فيه ...أمات الله عقلك ..
ونراك دائما وابدآ علي كرسي الحكم ..ولكن مشلولا ...فاقد الوعي والادراك .
الريس : (وقد استشاط غضبا ..) اكيد ده من معادي النظام ...ما الشعب اهوه
في حد بيتكلم ...لا طبعآ .. من كتر النعمة اللي هما فيها مش قادرين يرفعوا
راسهم ويفتحوا بقهم في وشي ..ليه؟؟؟من الخجل ...ايوه ...خجلانين يطلبوا مني
حاجة ..بعد الخير اللي شايفينه..دا انا مغرقهم خيرات .
المذيع : فعلا سعادتك ...ومن كتر ما هما غرقانين مش عارفين يتنفسوا .
الريس يضحك) ها ها ها ها ..لعلمك ..انا قلبي كبير ...ويساع ال 75 مليون .
المذيع : يا افندم الشعب بيحبك ..والدليل ..التأبيدة ...قصدي ال 25 سنة حكم .
الريس : وانا بأحب الشعب .. اللي بعده .
المذيع : رسالة sms ..( يتردد ) اقولها سعادتك ؟
الريس : انا قولتلك اتكلم وبكل صراحة ...قول .
المذيع : الله يحرقك .
الريس : ( نهض من علي الكرسي ثائرآ ) انته بتقول ايه يا كلب انت؟
المذيع : يا افندم مش انا ...دي الرسالة .
الريس : ( يجلس هادئآ) اه...الرسالة ...معلش ...والله دا رأي قلة من الهدامين
وبعدين كل شيئ في علم الله ...يا عالم مين حيدخل الجنة ..ومين حيدخل النار ..
اللهم اجعلنا من أهل الجنة .
المذيع يهمس لنفسه) عايز نعيم دنيا ونعيم أخره ابن ال ......... ابقا تعاله قابلني .
في رسالة من طفلة مصابة بالسرطان ...بتقول فيها ...
اشوفه منتشر ومتوغل وينمو في كل حته في جسمك ...ما يخلي ولا حتة سليمة
عشان تعاني زي ما بنعاني ...منك لله انته ويوسف والي ..يارب اشوفك مكاني
ولا ينفع معاك دوا ولا طبيب .
الريس : ايه قصدها البنت دي ؟
المذيع : دي بتدعي علي سعادتك ..يجيلك سرطان وما توعاش تتعالج منه .
الريس : حاجة غريبة ...الناس بتضر روحها وتلوم علينا ....يجيبوا لنفسهم المرض
ويتهمونا ...نعمل مشاريع ونشغل الشباب ...يرجعوا يقولوا مشارعكم جابتلنا الامراض.
نقفل المشاريع ..واصحابها يهربوا ...(يتدارك) قصدي يحاولوا يهربوا ..يتم محاسبتهم
يرجع الشعب يقول ...احنا في بطالة ...نعملهم ايه .؟؟؟؟نقطع نفسنا ؟؟
المذيع : والله يا افندم الواحد مش عارف يقول ايه ...سيادتك مقطع روحك علي الاخر
كل يوم والتاني مباحثات وزيارات دولية وغير دولية ..ووساطات من اجل السلام ...
كان الله في عون سعادتك ..انته فعلا حمامة يا افندم .
الريس :ايه؟؟؟
المذيع : حمامة سلام يا باشا ......جانا فاكس من فنانة مشهورة ..بتقول فيه .
الريس : ( يقاطعه) انا عارف الفاكس بيقول ايه ...بتقول ...الله يطول في عمرك يا ريس
كمان وكمان ...ويديك علي قد نيتك ..وتوصلنا للعالمية ..ونبقي في عهدك هوليود الشرق
أدامك الله .
المذيع: ده فعلا نص الرسالة يا افندم ..وكلامها حقيقي يا افندم ..احنا في ازدهار
وتقدم سينمائي ..بسم الله ما شاء الله ..الدليل علي كده يا افندم ..عمارة يعقوبيان
شرفنا وشرف الفن المصري ..بس ايه ده يا افندم ؟؟معقول ...عرفت نص الرسالة
من غير ما أقراه ..انت فيك حاجة لله يا باشا .
الريس : الحمد لله ...دي نعمة من عند الله ...هات ما عندك .
المذيع : رسالة من امام مسجد ...بيقول ..اللهم عليك به ..اللهم عليك به ...اللهم لا تؤاخذنا
بما فعل السفهاء منا ..اللهم لا تؤاخذنا بما فعل السفهاء منا..اللهم لا تؤاخذنا
بما فعل السفهاء منا..اللهم لا تؤاخذنا بما فعل السفهاء منا..اللهم لا تؤاخذ....
الريس يقاطعه بشده ) في ايه ؟؟؟ما خلاص ..عرفت ..لازم تكررها يعني؟
المذيع : يا افندم هوا اللي كاتبها أكتر من 50 مرة .
الريس : وكنت ناوي تقول ال 50 مرة ؟ خلاص ...انا عارف مين اللي يقصده ..
وعايز اقوله ..اطمن مصر وشعب مصر بخير ... وفي قلة من ذوي المناصب بيحولوا
يستغلوا مناصبهم ..سواء في وزارة الداخلية أو غيرها من الوزارات ...واوعده واوعد
الجميع ...كل هؤلاء سوف يتم التعامل معهم وباقصي درجات الشدة .
المذيع : رسالة أخيرة لسيادتك ..من أم فقدت ابنها في حادث العبارة الاخير ....
روح منك لله ...اشوف فيك يوم مالوش ملامح ...اشوفك غرقان في شبر ميه يا بعيد
ويلموك حتة حتة وما يعرفوا يجمعوك ...تموت ناقص زي ما انت دايما ناقص .
الريس : ( متعصبآ ) الولية دي كاتبة عنوانها ؟
المذيع : ( خائفآ) ايوه يا افندم .
الريس وهو يعض علي شفتيه) ابقا ادهولي ...لازم اروح للست دي بنفسي
ايه ؟؟؟التعويض ما وصلهاش لحد النهاردة ؟؟مش ممكن الاهمال ده ...انا حأكون
ابن لها ...حاعوضها عن كل اللي شافته ..واوعدها ..ان دي تكون أخر مرة تحس
فيها بالحزن والالم !!!!!
المذيع : يا سلام علي طيبة قلب سعادتك ....معلش يا افندم ..في رسالة sms وصلت
حالا ..ممكن نقراها ؟
الريس : قول يا سيدي .
المذيع : الرسالة بتقول ...إلهي وانته جاهي ..أشوفك ديك ...ومراتك فرخة ..وعيالك
كتاكيت ..وتجيلكم فرة انفلونزا الطيور تشيلكم وتريحنا منكم .
الريس يضحك) ها ها ها ها ها ها ..انفلونزا ايه وبتاع ايه بس ؟؟احنا ما يحوأش
فينا حاجة يابني ...احنا شربنا من مية النيل ...وبعدين اتطمن يا حبيبي ..كل شيئ
تحت السيطرة .
المذيع : (لنفسه) طب ما حنا شربنا برضه ..في ناس ماتت مننا ليه ؟؟احنا سعدنا بلقاء
سعادتك ...وفي نهاية البرنامج ..تحب تسمع ايه؟
الريس : عايز اسمع خبر كل مصري ....قصدي ...الشعب كله اكيد بيحب أغنية
اخترناك ..وانا كمان بأحبها أوي ..
المذيع : بنشكر سعادتك علي سعة صدرك ...والي لقاء أخر في برنامج علي قلبكم
وقلب اللي جابوكم
| |
|
ROMI0
مشرف
عدد الرسائل : 50
تاريخ التسجيل : 25/10/2007
the points
the points:
(1000/5000)
| |
